ពុទ្ធសាសនា និង​ចរិយាធម៌

ពុទ្ធសាសនា និង​ចរិយាធម៌

មនុស្ស​យើង​ជា​សត្វ​សង្គម រស់​នៅ​ក្នុង​សង្គម មាន​ឥទ្ធិពល​លើ​សង្គម និង​ទទួល​ឥទ្ធិពល​ពី​សង្គម​គ្រប់​ពេល​វេលា ។ សង្គម​និង​ទៅ​ជា​សង្គម​ល្អ ក៏​ព្រោះ​មនុស្ស​ក្នុង​សង្គម​ជា​មនុស្ស​ល្អ​ដែរ ។ មនុស្ស​ល្អ គឺ​មនុស្ស​ដែល​មាន​មារយាទ​ល្អ, មារយាទ​ថ្លៃ​ថ្នូរ ។

ណ្ហើយ! អត្ថ​គម្ពីរ​ភាព​ទុក​នាទី​ឲ្យ​អ្នក​សង្គម​វិទូ និង​អ្នក​បរមត្ថ​ទៅ​ចុះ ក្នុង​ទី​នេះ យើង​និយាយ​ងាយ​ៗ ទៅ​តាម​មើល​ឃើញ ទៅ​តាម​ដឹង មិន​និយាយ​ទៅ​តាម​ជើង​គម្ពីរ​សុទ្ធ​ពេក​ទេ​។

ព្រះ​ពុទ្ធសាសនា មាន​ព្រះ​វិន័យ​បញ្ញត្តិ ជា​ខ​បង្គាប់​មិន​ឲ្យ​ធ្វើ​និង​ព្រះ​ធម៌ ជា​ខ​អនុញ្ញាត​ឲ្យ​ប្រព្រឹត្ត​តាម ទាំង​បព្វជិត ទាំង​គ្រហស្ថ សម​ល្មម​តាម​ឋានៈ និង​វ័យ ជា​គោល​ដែល​មនុស្ស​គ្រប់​រូប​បដិបត្តិ​បាន ។ ភាព​ជា​អ្នក​មាន​មារយាទ​ល្អ មារយាទ​ថ្លៃ​ថ្នូរ ជា​ចរិយធម៌ ដែល​បុគ្គល​គ្រប់​រូប គ្រប់​វ័យ ត្រូវ​ប្រតិបត្តិ​ជា​និច្ច, ព្រះ​ពុទ្ធសាសនា បាន​សំដែង​ចរិយា​ដើម្បី​អប់រំ​មនុស្ស​ឲ្យ​មាន​មារយាទ​ល្អ មារយាទ​ថ្លៃ​ថ្នូរ ដូច​ត​ទៅ​នេះ៖

១- អប់រំ​ឲ្យ​វៀរ​ការ​បៀតបៀន​គ្នា មិន​ថា​ដោយ​ផ្លូវ​ត្រង់ ឬ​ផ្លូវ​អម, ឲ្យ​ចិញ្ចឹម​ជីវិត​តែ​ក្នុង​ផ្លូវ​ប្រពៃ (សម្មាអាជីរៈ) ឲ្យ​ចេះ​ជួយ​គ្នា​ទៅ​វិញ​ទៅ​មក តាម​កម្លាំង​ដែល​អាច​ធ្វើ​បាន ។

២-អប់រំ​ឲ្យ​និយាយ​តែ​ពាក្យ​ពិត មាន​សារ​ប្រយោជន៍ សម​តាម​បុគ្គល, ស្ថាន​ទី និង​កាល​សម័យ ។

៣-អប់រំ​ឲ្យ​មាន​សុចរិត​ទៀង​ត្រង់​ចំពោះ​មុខ​ងារ នាទី, ខ្មាស​បាប​ខ្លាច​បាប ជា​ដើម ។

ព្រះ​ពុទ្ធ​ទ្រង់​បញ្ញត្តិ​វិន័យ ក៏​ដើម្បី​រក្សា​សេចក្ដី​រៀបរយ មាន​សាមគ្គី​រស់​នៅ​ជា​មួយ​គ្នា​ដោយ​មេត្តា​ធម៌ មាន​ការ​យោគ​យល់​គ្នា​ទៅ​វិញ​ទៅ​មក ។ បើ​សង្គម​មនុស្ស​ប្រព្រឹត្ត​តាម​ឱវាទ​ដែល​ព្រះ​ពុទ្ធ​បាន​សំដែង​ទុក​យ៉ាង​ហោច​ត្រឹម​តែ​សីល​៥ ក៏​គង់​បាន​ប្រយោជន៍ និង​សេចក្ដី​សុខ​ច្រើន​ជាង​អ្នក​មិន​ប្រព្រឹត្ត​ដែរ ។ តើ​សីល​៥ មាន​សេចក្ដី​សំខាន់​ដូច​ម្ដេច​ខ្លះ​ក្នុង​ការ​អប់រំ​ឲ្យ​ក្លាយ​សភាព​ពី​មនុស្ស​អាក្រក់ មក​ជា​មនុស្ស​ល្អ ? សីល​៥ នោះ​គឺ៖

១-បាណាតិបាត ឲ្យ​វៀរ​សម្លាប់​សត្វ ។ ខ​នេះ​ប្រដៅ​ឲ្យ​បណ្ដុះ​ពូជ គឺ​មេត្តា​ករុណា​ដល់​មនុស្ស​សត្វ​គ្រប់​ប្រភេទ មិន​ឲ្យ​ប្រទូសរ៉ាយ​បៀតបៀន​រាង​កាយ​ដល់​គ្នា​និង​គ្នា​គ្រប់​វិធី ។

២-អទិន្នាទាន ឲ្យ​វៀរ​ការ​លួច ។ ខ​នេះ ជា​ការ​ហាម​មិច្ឆាជីវៈ(រក​ស៊ី​ទុច្ចរិត) ឲ្យ​ប្រឹង​ប្រែង​រក​ស៊ី​ដោយ​កម្លាំង​និង​សេចក្ដី​អង់​អាច​របស់​ខ្លួន​គឺ សម្មាអាជីវៈ (រកស៊ី​ចិញ្ចឹម​ជីវិត​ក្នុង​ផ្លូវ​សុចរិត) ។

៣-កាមេសុ មិច្ឆាចារ ឲ្យ​វៀរ​ការ​ប្រព្រឹត្តិ​ខុស​ក្នុង​កាម ។ ខ​នេះ ប្រដៅ​ឲ្យ​មាន​សន្តោស ត្រេក​អរ​ចំពោះ​តែ​ភរិយា​របស់​ខ្លួន ដើម្បី​ការ​ពារ​ការ​បែក​បាក់​គ្នា​ក្នុង​ពួក ក្នុង​ក្រុម ឲ្យ​មាន​ការ​ទុក​ចិត្ត​គ្នា​ទៅ​វិញ ទៅ​មក ។

៤-មុសាវាទ ហាម​មិន​ឲ្យ​និយាយ​កុហក ក៏​ដើម្បី​ឲ្យ​មនុស្ស​ចេះ​សាង​ប្រយោជន៍​ដោយ​ពាក្យ​សំដី និង​សាង​មិត្ត​ភាព​រវាង​មនុស្ស​ផង​គ្នា ។

៥-សុរា ហាម​មិន​ឲ្យ​ផឹក​ទឹក​ស្រវឹង, ប្រយោជន៍​កុំ​ឲ្យ​មនុស្ស​ភ្លេច​ខ្លួន ក្នុង​ការ​សាង​ឋានៈ និង​ធ្វើ​ជីវភាព​ឲ្យ​ផុត​ចាក​ដំណៀល​ផ្សេង​ៗ​ដែល​កើត​អំពី​ការ​ប្រព្រឹត្ត​រាយ​មាយ ។

សីល​៥ នេះ​ជា​គោល​មូល​ដ្ឋាន​ដំបូង​បង្អស់ សម្រាប់​អប់រំ​មនុស្ស​ឲ្យ​មាន​សណ្ដាប់​ធ្នាប់​ត្រឹម​ត្រូវ​ល្អ ។

បើ​យើង​ពិចារណា​ទៅ​តាម​ហេតុ​ផល​ពិត​ៗ អាច​ឃើញ​ថា​សីល​៥ នេះ​ជា​កាព្វកិច្ច​របស់​សង្គម​មនុស្ស​ត្រូវ​តែ​ប្រព្រឹត្ត ព្រោះ​មនុស្ស​យើង​ដោយ​ធម្មជាតិ​រមែង​ស្អប់​ខ្ពើម​ការ​ប្រទូសរ៉ាយ កាប់​សម្លាប់​គ្នា, លួច​ប្លន់ ប្រវ័ញ​ទ្រព្យ​សម្បត្តិ​គ្នា លួច​ប្ដី​កូន​ប្រពន្ធ​គ្នា​តាម​ចិត្ត​ចង់ និយាយ​ភូត​ភរ បញ្ឆោត​គ្នា ។ ការ​មិន​មាន​របៀប​រៀប​រយ​ក្នុង​សង្គម ក៏​ព្រោះ​តែ​មនុស្ស​មិន​ចេះ​គោរព​សិទ្ធិ​គ្នា, ប្រព្រឹត្ត​រំលោភ​លើ​រាង​កាយ, ទ្រព្យ​សម្បត្តិ​គ្នីគ្នា​តាម​អំពើ​ចិត្ត ។

ចំពោះ​សីល​ទី៥ គឺ “សុរា” តាម​ទស្សនៈ​អ្នក​ខ្លះ​ជា​ពិសេស ទស្សនៈ​អ្នក​និយាយ​សុរា​ថា សុរា​នាំ​ឲ្យ​ឆ្ងាញ់​បាយ បើ​ផឹក​ច្រើន​ទើប​ឲ្យ​ទោស , ខ្លះ​ថា សុរា​នាំ​ឲ្យ​មាន​សតិ​បញ្ញា ។ តើ​អ្នក​អាន​យល់​យ៉ាង​ណា​?

រឿង​សុរា​នេះ តាម​ទស្សនៈ​ព្រះ​ពុទ្ធសាសនា ថា​ជា​កិច្ច​ត្រូវ​រៀវ​ឲ្យ​ផុត ។ ព្រោះ​ហេតុ​ថា សុរា​ជា​ប្រភព​នៃ​សេចក្ដី​វិនាស​ច្រើន​យ៉ាង​ណាស់ ។ ក្នុង​គម្ពីរ​ព្រះ​ត្រៃ​បិដក មាន​សំដែង​បញ្ជាក់​ទោស​កើត​អំពី​ការ​ផឹក​សុរា​៦​យ៉ាង​គឺៈ

១-សុរា នាំ​ឲ្យ​ខាត​បង់​ទ្រព្យ ។ ជីវិត​យើង បើ​ខ្វះ​អាហារ​និង​ត្រូវ​ស្លាប់, ចំណែក​សុរា បើ​មិន​ផឹក​ក៏​មិន​ស្លាប់​ដែរ ។ ហេតុ​នោះ សុរា​ចាត់​ជា​វត្ថុ​ធ្វើ​អ្នក​ផឹក​ឲ្យ​ចាយ​វាយ​ទ្រព្យ​ដោយ​មិន​ចាំ​បាច់ ។

២-សុរា នាំ​ឲ្យ​យក​ជម្លោះ ។ អ្នក​ដែល​ផឹក​សុរា ដោយ​ច្រើន​ធ្វើ​អ្វី​ខុស​ពី​មនុស្ស​ធម្មតា អាច​និយាយ​ឡក​ឡឺយ​ឲ្យ​កូន​ប្រពន្ធ​គេ ឥត​ខ្មាស​អៀន​ឥត​កោត​ញញើត, បើ​មាន​គេ​ធ្វើ​ឲ្យ​ខុស​ចិត្ត សូម្បី​តែ​បន្តិច​បន្តួច ក៏​បញ្ចេញ​សេចក្ដី​ខឹង​ដូច​ភ្លើង​ឆេះ​ព្រៃ បណ្ដាល​ឲ្យ​មាន​ជម្លោះ វាយ​តប់ កាប់​សម្លាប់​គ្នា ។ ការ​វិវាទ​គ្នា​ព្រោះ​ឥទ្ធិពល​សុរា មាន​ច្រើន​ជាង​រឿង​ដទៃ​ទាំង​អស់ ។

៣-សុរា នាំ​ឲ្យ​កើត​រោគ ។ សុរា​ជា​ថ្នាំ​ពិស​មួយ​បែប តែ​ជា​ថ្នាំ​ពិស​មិន​ធ្វើ​ឲ្យ​អន្តរាយ​ដល់​អ្នក​ផឹក​ភ្លាម​ៗ ដូច​ថ្នាំ​ពិស​ឯ​ទៀត​ទេ, ជា​ថ្នាំ​ពិស​ឲ្យ​ទោស​ពិបាក​យល់ គឺ​ឲ្យ​បន្តិច​ម្ដង​ៗ បើ​មិន​សង្កេត​មិន​ដឹង, សុរា​បន្ថយ​កម្លាំង​កាយ និង​ជីវិត​អ្នក​ផឹក​គ្រប់​ពេល​វេលា ។

តាម​តម្រា​បរទេស បាន​បញ្ជាក់​រោគ​ដែល​កើត​ព្រោះ​ការ​ផឹក​សុរា​មាន​ច្រើន​ប្រភេទ​ណាស់​ដូច​ជា៖

ក/សុរា ធ្វើ​ក្រពះ​អាហារ និង​ពោះវៀន​ឲ្យ​ដំបៅ

ខ/សុរា ធ្វើ​អ្នក​ផឹក​ឲ្យ​ញ័រ​ដៃ​ជើង​ភ្នែក​ស្រវាំង​វិកល​ចរិត​ដែល​គេ​ហៅ​ថា “ឆ្កួត​សូរា” ។

គ/ សុរា បើ​ផឹក​តែ​ល្មម​សម​គួរ ធ្វើ​ជីព​ចរ​ឲ្យ​មាន​ចលនា​រហ័ស​ជាង​ប្រក្រតី បើ​ផឹក​ច្រើន ធ្វើ​ជីពចរ​ឲ្យ​ខ្សោយ មាន​ចលនា​មិន​ស្មើ​គ្នា​វែង​ខ្លី​ៗ ទី​បំផុត​ក៏​បាត់​ស្មារតី ។

ឃ/​សុរា នាំ​ឲ្យ​កើត​រោគ​ទឹក​នោម​ផ្អែម ឈឺ​តាម​សន្លាក់​ដៃ​ជើង​បេះ​ដូង​គាំង (ឈប់​ដើរ) ។

ង/សុរា នាំ​ឲ្យ​អ្នក​ផឹក​ដក​ដង្ហើម​យឺត​” មិន​ស្មើ​គ្នា ។

មិន​តែ​ប៉ុណ្ណោះ សុរា​នាំ​ឲ្យ​កើត​រោគ​ច្រើន​ប្រការ​ទៀត​គឺ រោគ​ស្រវឹង​ស្រា, រោគ​គ្រុន​ព្រោះ​សុរា, រោគ​នឿយ​ណាយ​អាហារ​មិន​នឹក​ឃ្លាន, ស្ពឹក​ស្រពន់ ភ្លេច​ងាយ, និយាយ​ផ្ដេស​ផ្ដាស,… ។

៤-សុរា នាំ​ឲ្យ​ត្រូវ​ដំណៀល ។ យ៉ាង​ណា​មិញ អ្នក​ស្រវឹង​ស្រា​ ដោយ​ច្រើន​សំដែង​កិរិយា​មិន​គួរ​មើល មិន​គួរ​ស្ដាប់ ធ្វើ​ឲ្យ​សេចក្ដី​រំខាន​ដល់​អ្នក​ជិត​ខាង ដោយ​ការ​ច្រៀង​រាំ​រឡេរឡូ ប្រព្រឹត្តិ​អំពើលាមក​ផ្សេង​ៗ សូម្បី​តែ​ផឹក​ហើយ​ព្យាយាម​រក្សា​មារយាទ​យ៉ាង​ល្អ ក៏​គង់​ត្រូវ​គេ​រិះ គន់​តិះ​ដៀល​ប្រមាថ​ថា ជា​មនុស្ស​ប្រមឹក​ដែរ, នឹង​ទៅ​ទី​ស្ថាន​ណា ច្រើន​សាង​សត្រូវ​ដើម្បី​ខ្លួន​ឯង ។

៥-សុរា នាំ​ឲ្យ​មិន​ចេះ​ខ្មាស​អៀន ។ មនុស្ស​យើង​តាម​ធម្មតា​មាន​សេចក្ដី​ខ្មាស​អៀន និង​តៅ​ណា​មក​ណា តែង​តែ​ស្លៀកពាក់​រៀប​រយ បើ​និយាយ​ក៏​ប្រយ័ត្ន​សំដី តែ​បើ​ត្រូវ​ពិស​សុរា​ចូល​ហើយ ក្លាយ​ជា​មនុស្ស​មាន​ការ​គិត​ប្លែក​ៗ​ប្រព្រឹត្ត​ខុស​ទំនង ដូច​ជា ដេក​តាម​ផ្លូវ​ដើរ​ក៏​បាន អង្គុយ​លើ​វត្ថុ​ស្មោក​គ្រោក​ក៏​បាន អាក្រាត​កាយ​ក្នុង​ទី​សាធារណៈ​ក៏​បាន ធ្វើ​កាយ​វិការ​មិន​គួរ​មើល​ក៏​បាន​គឺ​ថា​ឲ្យ​តែ​ស្រវឹង​សុទ្ធ​តែ “ក៏​បាន​”ទាំង​អស់ ។

៦-សុរា​ធ្វើ​ឲ្យ​ខ្សោយ​បញ្ញា ។ បញ្ញា​ជា​គុណ​សម្បត្តិ គឺ​ការ​ឈ្លាស​វៃ ស្គាល់​ល្អ អាក្រក់ ដឹង​ការ​វិនាស​ចម្រើន បញ្ញា​កើត​មាន​ព្រោះ​ហេតុ​ឧស្សហ៍​៣​យ៉ាង​គឺ ស្ដាប់-គិត-អប់រំ 1 ។ ចំណែក​មនុស្ស​ប្រមឹក គ្មាន​ឱកាស​នឹង​ប្រកប​ហេតុ​ទាំង​៣​យ៉ាង​នេះ​ទេ រវល់​តែ​គិត​រឿង​សុរា ឬ​រឿង​នៃ​សេចក្ដី​វិនាស​ផ្សេង​ៗ តាម​តែ​សុរា​ដឹក​នាំ​ឲ្យ​ធ្វើ, ដោយ​ហេតុ​នេះ បញ្ញា​ទើប​កើត​មិន​បាន​សូម្បី​តែ​មាន​ហើយ ក៏​ត្រូវ​សាប​សូន្យ​ទៅ​វិញ​ជា​ប្រាកដ ។

តម្រា​ពេទ្យ​មាន​និយាយ​ថា សុរា​ដែល​ផឹក​ចូល​ទៅ រមែង​ធ្វើ​ខួរ​ក្បាល​ឲ្យ​ថយ​គុណ​សម្បត្តិ​មដ្ង​បន្តិច​ៗ, និង​គិត​អ្វី​ៗ​ច្រើន​មាន​លក្ខណៈ​រាយ​មាយ, មិន​ច្បាស់​លាស់, អស់​សេចក្ដី​វាង​វៃ ។

សេចក្ដី​ដែល​ពណ៌នា​មក​ប៉ុណ្ណេះ ជា​ការ​តប​ឆ្លើយ​និង​ទស្សនៈ​អ្នក​សុរា​និយាយ​បាន​ដោយ​គ្រប់គ្រាន់ ហើយ​ក៏​បញ្ជាក់​ឲ្យ​ឃើញ​ថា សីល​៥ មាន​សារ​សំខាន់​យ៉ាង​ណា​ខ្លះ, បើ​មនុស្ស​មិន​ប្រព្រឹត្ត តើ​មាន​អ្វី​កើត​ឡើង ។ សូម​អ្នក​អាន​ពិចារណា តាម​ការ​គួរ ។

រៀបរៀងដោយ៖ ឱម ខែម

1-សុតា​មយបញ្ញា ចិតន្តាមយបញ្ញា ភាវនា​មយបញ្ញា ។



Important Notice: Help Stop the Spread and Stay Healthy. (Read now)