លោកយាយ Margaret Keenan អាយុ ៩០ឆ្នាំ បានក្លាយជាមនុស្សដំបូងគេនៅលើពិភពលោក ដែលបានចាក់ថ្នាំបង្ការជំងឺកូវីដ-១៩ ជាផ្លូវការកាលពីថ្ងៃអង្គារ ខណៈពេលអង់គ្លេសចាប់ផ្តើមយុទ្ធនាការចាក់ថ្នាំបង្ការដល់ប្រជាជនរបស់ខ្លួនក្នុងទ្រង់ទ្រាយធំ។
បុគ្គលិកសុខាភិបាលអង់គ្លេសបានចាប់ផ្តើមចាក់ថ្នាំបង្ការ ដល់ជនដែលងាយរងគ្រោះបំផុតជាមួយនឹងថ្នាំបង្ការដែលផលិតដោយក្រុមហ៊ុន Pfizer និង BioNTech។ ករណីនេះ ជាការសាកល្បងសម្រាប់ពិភពលោកផងដែរ ខណៈដែលមានបញ្ហាទាក់ទងនឹងការចែកចាយ និង ការរក្សាទុកថ្នាំបង្ការនេះនៅសីតុណ្ហភាព –៧០C (-៩៤F) ជាដើម។
លោកយាយ Margaret Keenan ដែលនឹងឈានចូលវ័យ ៩១ឆ្នាំ នាសប្តាហ៍នេះ គឺជាមនុស្សដំបូងគេដែលបានទទួលការចាក់ថ្នាំបង្ការនៅឯមន្ទីរពេទ្យមួយក្នុងទីក្រុង Coventry ភាគកណ្តាលនៃប្រទេសអង់គ្លេស។
លោកយាយថ្លែងថា៖ «វាជាកាដូមុនថ្ងៃខួបកំណើតដ៏ល្អបំផុតដែលខ្ញុំប្រាថ្នា ព្រោះវាមានន័យជាទីបំផុតសម្រាប់ខ្ញុំ ដែលអាចចំណាយពេលវេលាជាមួយក្រុមគ្រួសារ និង មិត្តភក្តិរបស់ខ្ញុំក្នុងឆ្នាំថ្មីនេះ»។
អង់គ្លេសរងគ្រោះខ្លាំងជាងគេនៅអឺរ៉ុបនាពេលថ្មីៗនេះ មានអ្នកស្លាប់ជាង ៦១,០០០នាក់ គឺជាប្រទេសលោកខាងលិចដំបូងបង្អស់ដែលបានចាប់ផ្តើមយុទ្ធនាការចាក់ថ្នាំបង្ការជាផ្លូវការ។ ពលរដ្ឋដែលចាក់ថ្នាំបង្ការលើកទី១នេះរួច ត្រូវរង់ចាំរយៈពេល៣សប្ដាហ៍ដើម្បីចាក់ថ្នាំបង្ការលើកទី២ ឱ្យគ្រប់ចំនួន២ដូស។
រដ្ឋមន្រ្តីក្រសួងសុខាភិបាលអង់គ្លេសលោក Matt Hancock រំពឹងថាពលរដ្ឋរាប់លាននាក់ នឹងត្រូវបានចាក់ថ្នាំបង្ការនៅត្រឹមដំណាច់ឆ្នាំនេះ និងបានហៅការចាប់ផ្តើមយុទ្ធនាការនេះថា «V-Day»។ លោកបន្តក្រើនរំឭកដល់ពលរដ្ឋ គួរតែអនុវត្តន៍គម្លាតសង្គមឱ្យបានខ្ជាប់ខ្ជួនផងដែរ។ លោកសង្ឃឹមថាពលរដ្ឋងាយរងគ្រោះបំផុតនឹងទទួលបានថ្នាំបង្ការគ្រប់ៗគ្នា៕
