កាណាដារំពឹងថាខ្លួននឹងមានថ្នាំបង្ការក្នុងដៃចំនួន ២៤៩,០០០ដូសនៅដំណាច់ឆ្នាំនេះ
អាជ្ញាធរសុខាភិបាលកាណាដាបានទទួលយកសំណើរបស់ក្រុមហ៊ុន Pfizer/BioNTech នៅថ្ងៃទី ៩ ខែតុលា ឆ្នាំ២០២០ ហើយបន្ទាប់ពីការពិនិត្យមើលលើទិន្នន័យពិសោធន៍ដោយហ្មត់ចត់នោះ កាណាដាបានបញ្ជាក់ថាថ្នាំបង្ការរបស់ Pfizer/BioNTech បំពេញតាមតម្រូវការសុវត្ថិភាព ប្រសិទ្ធភាព និង គុណភាព ដែលអាចប្រើប្រាស់បាននៅក្នុងប្រទេសកាណាដា។
កាណាដាបានក្លាយជាប្រទេសទី៣ ដែលបានផ្តល់អនុញ្ញាតឱ្យប្រើប្រាស់ថ្នាំបង្ការកូវីដ–១៩ ផលិតដោយក្រុមហ៊ុន Pfizer Inc និង ក្រុមហ៊ុន BioNTech SE ដើម្បីចាក់ថ្នាំបង្ការនេះដល់ពលរដ្ឋខ្លួនដែលងាយរងគ្រោះបំផុត។ បើគ្មានការប្រែប្រួលទេ កាណាដានឹងចាប់ផ្តើមការចាក់ថ្នាំបង្ការរបស់ខ្លួននៅដើមសប្តាហ៍ក្រោយ។ កាណាដាក៏រំពឹងផងដែរថាខ្លួននឹងមានថ្នាំបង្ការក្នុងដៃចំនួន ២៤៩,០០០ដូសនៅដំណាច់ឆ្នាំនេះ ដើម្បីកាត់បន្ថយហានិភ័យ និង បញ្ហាប្រឈមដ៏គួរឱ្យភ័យខ្លាចសម្រាប់ប្រទេសដែលមានទឹកដីធំជាងគេលំដាប់ទី២ នៅលើពិភពលោក។
តំណាង Pfizer នៅកាណាដាបានថ្លែងថា តាមរយៈកិច្ចព្រមព្រៀង ខ្លួននឹងផ្គត់ផ្គង់ថ្នាំបង្ការដល់ប្រទេសកាណាដារហូតដល់ទៅ ៧៦លានដូស៕
