នៅទីបំផុតអាជ្ញាធរចំណីអាហារ និង ឱសថអាមេរិកបានអនុញ្ញាតឱ្យប្រើប្រាស់បន្ទាន់នូវថ្នាំបង្ការរបស់ក្រុមហ៊ុន Pfizer
អាជ្ញាធរចំណីអាហារ និង ឱសថអាមេរិក (FDA) ថ្លែងថាខ្លួនបានអនុញ្ញាតឱ្យប្រើថ្នាំបង្ការPfizer ដែលរំពឹងថាការចាក់ថ្នាំបង្ការលើកដំបូងនឹងធ្វើក្នុងរយៈពេលប៉ុន្មានថ្ងៃ ដែលនេះជារបត់ថ្មីមួយនៅសហរដ្ឋអាមេរិកខណៈជំងឺរាតត្បាតនេះ បានសម្លាប់មនុស្សជាង ២៩២,០០០នាក់។ FDA បានផ្តល់ការអនុញ្ញាតឱ្យប្រើប្រាស់ជាបន្ទាន់នូវថ្នាំបង្ការដែលអភិវឌ្ឍន៍រួមគ្នាជាមួយដៃគូ អាល្លឺម៉ង់BioNTech ត្រូវបានប្រកាសថាមានប្រសិទ្ធភាព ៩៥ ភាគរយ ក្នុងការបង្ការជំងឺកូវីដ–១៩ ក្នុងការពិសោធដំណាក់កាលចុងក្រោយ។
អាជ្ញាធរចំណីអាហារ និង ឱសថអាមេរិក បញ្ជាក់ថាថ្នាំបង្ការនេះ អាចត្រូវផ្តល់ឱ្យពលរដ្ឋដែលមានអាយុចាប់ពី ១៦ឆ្នាំឡើងទៅ។ បុគ្គលិកសុខាភិបាល និង មនុស្សចាស់ជរានៅក្នុងមណ្ឌលថែទាំរយៈពេលវែង ត្រូវបានគេរំពឹងថានឹងក្លាយជាបុគ្គលអាទិភាពក្នុងការទទួលបានថ្នាំបង្ការលើកទី១ ដែលមានចំនួន ២,៩លានដូស។
លោកប្រធានាធិបតីអាមេរិក ដូណាល់ ត្រាំ បានថ្លែងថា ថ្នាំបង្ការ នឹងមិនគិតថ្លៃឡើយ សម្រាប់ពលរដ្ឋអាមេរិកទាំងអស់ ហើយការចាក់ថ្នាំបង្ការដំបូង នឹងត្រូវអនុវត្តន៍ក្នុងរយៈពេលមិនតិចជាង២៤ ម៉ោង៕