នៅទីបំផុតអាជ្ញាធរអូស្ដ្រាលី បានអនុញ្ញាតឱ្យប្រើប្រាស់នូវថ្នាំបង្ការរបស់ក្រុមហ៊ុន Pfizer
រដ្ឋបាលត្រួតពិនិត្យផលិតផលព្យាបាល(TGA) នៅថ្ងៃនេះ បានអនុម័តឱ្យប្រើប្រាស់ថ្នាំបង្ការ Pfizer/BioNTech នៅក្នុងប្រទេសអូស្ត្រាលី។ Pfizer បានបំពេញតាមស្តង់ដារដ៏តឹងរ៉ឹងលើផ្នែក សុវត្ថិភាព គុណភាព និង ប្រសិទ្ធភាព។
ការអនុម័តជាបណ្តោះអាសន្នរបស់ TGA គឺសម្រាប់បុគ្គលដែលមានអាយុចាប់ពី ១៦ ឆ្នាំឡើងទៅ ដែលត្រូវការថ្នាំបង្ការចំនួន ០២ដូស យ៉ាងហោចណាស់ ២១ ថ្ងៃចន្លោះពីថ្ងៃចាក់លើកទី១ និង លើកទី២។
ការចាក់ថ្នាំបង្ការដំបូងគេ ត្រូវរំពឹងថានឹងចាប់ផ្ដើមនៅចុងខែកុម្ភៈនេះ។ ប្រសិនបើមានការពន្យាពេលក្នុងការដឹកជញ្ជូន ឬ ការផ្គត់ផ្គង់ផលិតផលកើតមានឡើងនោះ ការចាប់ផ្តើមអាចនឹងកើតមាននៅដើមខែមីនា។
នាយករដ្ឋមន្រ្តីស្កុតម៉ូរីសុនបានថ្លែងថាការអនុម័តរបស់ TGA គឺជាជំហានដ៏សំខាន់មួយក្នុងការប្រយុទ្ធប្រឆាំងនឹង ជំងឺកូវីដ–១៩។ លោកនាយករដ្ឋមន្រ្តីបន្ដថា ខ្ញុំសូមស្វាគមន៍ចំពោះការអនុម័តរបស់ TGA ចំពោះថ្នាំបង្ការ Pfizer។ ជាមួយនឹងអ្នកជំនាញអូស្រ្តាលីរបស់យើង ដែលបានបញ្ជាក់ថាវាមានសុវត្ថិភាព ប្រសិទ្ធភាព និង ស្តង់ដារខ្ពស់។
«ប្រជាជនអូស្រ្តាលីគួរតែមានទំនុកចិត្តលើវិធីសាស្រ្តដ៏ហ្មត់ចត់ និង យកចិត្តទុកដាក់ ដោយនិយតករសុវត្ថិភាពលំដាប់ពិភពលោករបស់យើង។»
« អាទិភាពរបស់យើងគឺតែងតែរក្សាបាននូវសុខសុវត្ថិភាព ការការពារអាយុជីវិត និង ជីវភាពរស់នៅ របស់ប្រជាជនអូស្ត្រាលី។ ការយល់ព្រមឱ្យប្រើប្រាស់នៅថ្ងៃនេះគឺជាជំហានដ៏ធំមួយ ឆ្ពោះទៅមុខសម្រាប់សហគមន៍របស់យើង ជាពិសេសក្នុងការការពារប្រជាជនដែលងាយរងគ្រោះបំផុតរបស់យើង។»
