គ្រប់ថ្នាំបង្ការជំងឺកូវីដ–១៩ទាំងអស់សុទ្ធតែផលិតឡើងតាមរបៀបផ្សេងៗគ្នា ហើយក៏គ្មានក្រុមហ៊ុនណាមួយល្អឥតខ្ចោះសម្រាប់ប្រើលើមនុស្សគ្រប់គ្នានោះឡើយ។ ប៉ុន្តែវានឹងប្រើជាជម្រើសដើម្បីជួយដល់យើងទាំងអស់គ្នាផងដែរ។
ការរីករាលដាលនៃជំងឺកូវីដ–១៩ ទូទាំងពិភពលោកនៅតែបន្ដកើនឡើងជារៀងរាល់ថ្ងៃ ខណៈពេលដែលវិធានការនានារបស់បណ្ដាលប្រទេសក្នុងពិភពលោកត្រូវបានរឹតបន្ដឹងជាបន្ដបន្ទាប់ផងដែរ។ គិតត្រឹមថ្ងៃពុធ ទី១៨ ខែវិច្ឆកា ឆ្នាំ២០២០ នេះ ចំនួននៃអ្នកឆ្លង ជាសះស្បើយ និងស្លាប់ មានការកើនឡើងជាលំដាប់ ដែលទិន្នន័យសង្ខេបមានដូចខាងក្រោមនេះ ៖
-
ចំនួនអ្នកឆ្លងសរុប៖ ៥៥,៩៤០,១៣០ នាក់
-
ចំនួនអ្នកជាសះស្បើយ៖ ៣៨,៩៦០,៣៧៦ នាក់
-
ចំនួនអ្នកស្លាប់៖ ១,៣៤៣,១៥៣ នាក់
ខាងក្រោមនេះ ជាវឌ្ឍនភាពនៃក្រុមហ៊ុនផលិតឱសថនៅជុំវិញពិភពលោក៖
-
Pfizer/BioNTech
តាមរយៈសេចក្តីប្រកាសព័ត៌មានពីក្រុមហ៊ុនផលិតឱសថ Pfizer/BioNTech បានផ្ដល់នូវក្តីសង្ឃឹមមួយដល់មនុស្សជាតិក្នុងស្ថានភាពដ៏លំបាកនៃការរីករាលដាលរបស់ជំងឺកូវីដ–១៩ ។ ជាការពិតណាស់កម្រិតនៃការឆ្លងថ្មីបានកើនឡើងដល់កម្រិតខ្ពស់បំផុតនៅសហរដ្ឋអាមេរិក និង ប្រទេសមួយចំនួននៅជុំវិញពិភពលោកផងដែរ។ ក្រុមហ៊ុននេះក៏បានបញ្ជាក់ផងដែរនូវលទ្ធផលនៃការសាកល្បងដ៏ធំមួយដែលបង្ហាញថាថ្នាំបង្ការប្រឆាំងនឹងជំងឺនេះដំណើរការបានល្អប្រសើរគឺវាមានប្រសិទ្ធភាពលើសពី ៩០ភាគរយ ។ បើមានការអនុញ្ញាតពីរដ្ឋាភិបាលអាមេរិកនោះដំណើរការចាក់ថ្នាំបង្ការដល់ប្រជាជននឹងអាចកើតមានឆាប់ៗនេះ។ ក្រុមហ៊ុនបានត្រៀមរួចជាស្រេចក្នុងការផលិតថ្នាំនេះចំនួន ៥០លាន(ដូស)នៅឆ្នាំនេះ និង ១,៣ពាន់លាន(ដូស)ក្នុងឆ្នាំ ២០២១ ខាងមុខផងដែរ ។ Pfizer ត្រូវតែរក្សាទុក និង ដឹកជញ្ជូននៅសីតុណ្ហភាព –៧០អង្សា វាក៏អាចរក្សាទុកក្នុងទូទឹកកកធម្មតាបានរហូតដល់ទៅ ៥ថ្ងៃ ឬ រហូតដល់ ទៅ ១៥ថ្ងៃក្នុងពេលដឹកជញ្ជូនផងដែរ។
-
Moderna
ក្រុមហ៊ុនផលិតឱសថ Moderna Inc បានក្លាយជាក្រុមហ៊ុនទី២ របស់សហរដ្ឋអាមេរិក ដែលបញ្ចេញនូវទិន្នន័យពីការសិក្សាដ៏ធំមួយនៅក្នុងពិសោធន៍ថ្នាំបង្ការរបស់ខ្លួន ដោយថ្លែងថាវាមានប្រសិទ្ធភាព ៩៤,៥ ភាគរយដើម្បីប្រឆាំងនឹងជំងឺកូវីដ–១៩ ។ ក្រុមហ៊ុននេះរំពឹងថានឹងអាចផលិតបាន ២០លាន(ដូស)នៅចុងឆ្នាំនេះ និង ចន្លោះពី ៥០០លាន ទៅ ១ប៊ីលាន នៅឆ្នាំ២០២១។ Moderna អាចរក្សាទុកបាននៅសីតុណ្ហភាពនៃទូទឹកកកធម្មតាក្នុងរយៈពេល ៣០ថ្ងៃ ប៉ុន្តែសម្រាប់ការរក្សាទុករហូតដល់ ៦ខែ វាចាំបាច់ត្រូវការសីតុណ្ហភាព –២០អង្សា។
-
Sputnik V
ថ្នាំបង្ការ Sputnik V របស់ប្រទេសរុស្ស៊ីមានប្រសិទ្ធភាព ៩២ភាគរយ ក្នុងការការពារមនុស្សជាតិពីជំងឺកូវីដ–១៩ នេះបើយោងតាមលទ្ធផលនៃការសាកល្បងបណ្តោះអាសន្ន។ លទ្ធផលនេះ គឺផ្អែកលើទិន្នន័យដែលបានមកពីអ្នកចូលរួម ១៦,០០០នាក់ដំបូង ដែលបានទទួលថ្នាំបង្ការនេះ។
-
Sinovac Biotech
លទ្ធផលទទួលបានពីការសាកល្បងបឋមនៅថ្ងៃពុធនេះបានបង្ហាញថាក្នុងពិសោធន៍ទី១នៃថ្នាំបង្ការ CoronaVac គឺវាមានប្រតិកម្មនឹងភាពស៊ាំរហ័ស ប៉ុន្តែកម្រិតនៃអង្គបដិបក្ខនៅទាបជាងអ្នកដែលបានជាសះស្បើយពីជំងឺនៅឡើយ។ ជាមួយ CoronaVac ក៏មានការពិសោធចំនួនបួនផ្សេងទៀតផងដែរ ដែលត្រូវបានបង្កើតឡើងនៅក្នុងប្រទេសចិន ហើយបច្ចុប្បន្ននេះ កំពុងធ្វើការសាកល្បងនៅដំណាក់កាលចុងក្រោយដើម្បីកំណត់ពីប្រសិទ្ធភាពរបស់វាក្នុងការប្រឆាំងនឹងជំងឺកូវីដ–១៩ ។
-
AZD1222 (Oxford/AstraZeneca)
ថ្នាំបង្ការជំងឺកូវីដ–១៩ ពុំទាន់បានការអនុញ្ញាតនៅឡើយទេ ប៉ុន្តែការផលិតមួយចំនួនអាចនឹងត្រូវបានចាប់នៅក្នុងប្រទេសអូស្ដ្រាលីកាលពីសប្ដាហ៍កន្លងទៅនេះ។ ក្រុមហ៊ុន CSL បានបញ្ជាក់ថាខ្លួននឹងចាប់ផ្ដើមផលិតថ្នាំបង្ការ(Oxford/AstraZeneca) នៅរដ្ឋ Victoria។ ក្រុមហ៊ុនជីវបច្ចេកវិទ្យាវេជ្ជសាស្ដ្រ ASX មានកិច្ចសន្យាដាច់ដោយឡែកជាមួយនឹង AstraZeneca និង រដ្ឋាភិបាលសហព័ន្ធដើម្បីផលិតថ្នាំបង្ការ AZD1222 ប្រមាណ ៣០លាន(ដូស)។ (ដូស)ដំបូងត្រូវបានគ្រោងនឹងចេញនៅពាក់កណ្តាលឆ្នាំ២០២១ ដោយរង់ចាំលទ្ធផលនៃការសាកល្បង និង ការអនុម័តនូវបទប្បញ្ញត្តិជាមុនសិន។
-
Covaxin
ក្រុមហ៊ុន Bharat Biotech បានប្រកាសពីការសាកល្បងថ្នាំបង្ការជំងឺកូវីដ–១៩ ដំបូងបង្អស់របស់ឥណ្ឌា ដែលមានឈ្មោះថា Covaxin បានចាប់ផ្តើមជាមួយនឹងអ្នកចូលរួមប្រហែលជា ២៦,០០០នាក់ ។
