អាថ៌កំបាំង និង អត្ថន័យនៃប្រាសាទបាយ័ន
ដកស្រង់ចេញពីច្បាប់ដើម ទស្សនាវដ្ដីកម្ពុជសុរិយា ១២ឆ្នាំកន្លងទៅនេះ សហស្សវត្សឆ្នាំ២០០០ បានធ្វើសេចក្ដីថ្លែងការណ៍យ៉ាងឱឡារិក ដើម្បីវប្បធម៌សន្តិភាព និងអហិង្សា ហើយកំណត់ជាឆ្នាំអន្តរជាតិ ដើម្បីសន្តិភាពក្នុងដំណើរថ្មីមួយ ។ ចំពោះគំនិតរបស់សកលលោកខាងលើនេះ ខ្មែរយើងបាន ឃើញថា ដូនតាបុព្វបុរសរបស់យើងបានចាប់អារម្មណ៍ខ្ពស់ និង យូរលង់ណាស់មកហើយ កន្លងច្រើនសតវត្សរ៍ ចំពោះវប្បធម៌សន្តិភាព និងអហិង្សានេះ ដោយលោកបានសាបព្រោះបណ្ដុះបណ្ដាលពាសពេញផ្ទៃប្រទេស ក្នុងសិល្បៈ ក្នុងរូបចម្លាក់ ក្នុងក្បូរក្បាច់រចនា ក្នុងស្ថាបត្យកម្ម ក្នុងទំនៀមទម្លាប់ ក្នុងប្រពៃណី ក្នុងជំនឿសាសនា ក្នុងអារ្យធម៌ និងវប្បធម៌ទូទៅ មាន៖ ភាសា ពាក្យ របាំ ចម្រៀង តូរ្យតន្ត្រី កាយវិការ សម្រស់ សម្ផស្ស ញញឹម ពិធីការ បុណ្យទាន មនោសញ្ចេតនា អក្សរសាស្ត្រ អក្សរសិល្ប៍ កីឡា ប្រយុទ្ធ សិប្បកម្ម សំណង់ ផ្ទាំងសិលាចារឹក ប្រាង្គប្រាសាទ និងកសិណច្រើនទៀត ជានិមិត្តរូបនៃវប្បធម៌សន្តិភាព និងអហិង្សានោះ ។