សប្ដាហ៍នេះខ្ញុំលើកយកពាក្យចំនួនបួនទៀត ដែលមានសូរដូចគ្នា ប៉ុន្តែន័យនៃពាក្យខុសគ្នាមកបង្ហាញជូនដល់អ្នកទាំងអស់គ្នាដើម្បីបានជាគតិ និងជាប្រយោជន៍ក្នងការប្រើប្រាស់ពាក្យពេចន៍ឱ្យបានត្រឹមត្រូវ និងសម្រាប់ជាការពិចារណាទាំងអស់គ្នាក្នុងភាសាជាតិយើង។ ខាងក្រោមនេះជាអត្ថន័យនៃពាក្យនេះ ៖
គុន (ន.) ឈ្មោះសិល្បខាងគ្រឿងអាវុធ សម្រាប់ចូលប្រឡូកលោតហក់តយុទ្ធផ្ទាល់ខ្លួន ជាចំណេះវិសេសម្យ៉ាងរបស់អ្នកចម្បាំងពីក្នុងសម័យបុព្វបុរសរាល់ប្រទេស។ ឧទាហរណ៍៖ គុនដំបង គុនដាវវែង គុនដាវខ្លី គុនខែល និងគុនកាំបិតគ្រលុកជាដើម។
គន់ (កិ.) រកមើល តែកម្រនិយាយដាច់តែឯង ច្រើននិយាយថា គយគន់ឬគន់មើល។ ឧទាហរណ៍៖ សុខកំពុងគយគន់មើលប្រាសាទអង្គរវត្ត។
គណ (ន.) ពួក ក្រុម បន ហ្វូង។ ឧទាហរណ៍៖ មេគណខេត្តកណ្ដាល។
គុណ (១) (ន.) សេចក្ដីចម្រើន ថ្នាក់ ជាន់ លក្ខណៈ ចំណែក សេចក្ដីល្អ សភាព បែបបទ …។
(ន., គុ.) ដំណើរធ្វើឱ្យចម្រើនកើនឡើង។ ឧទាហរណ៍៖ គុណ១០ជា២០ លេខគុណ។
គុណ (២) (ន.) សភាវធម៌ដែលចម្រើនឡើងដោយលក្ខណៈរបស់ខ្លួនគួរគោរពតបស្នងនឹងខានពុំបាន។ ឧទាហរណ៍៖ គុណមាតា គុណបិតា គុណគ្រូ គុណលោកអ្នកមានឧបការៈលើខ្លួន។
(ន.) ធម៌ដែលគួរនឹក គួររំពឹងដល់។ ឧទាហរណ៍៖ គុណព្រះពុទ្ធ ព្រះធម៌ ព្រះសង្ឃ។
